शिवाजी महाराजांचे मोगलांस उत्तर"

मित्रहो, लंडनच्या राॅयल एशियाटिक सोसायटीच्या ग्रंथात एक फारसी हस्तलिखित आहे. या ग्रंथाचे नाव " खुतूते शिवाजी " म्हणजे शिवाजीची पत्रे असे आहे. या हस्तलिखिताची आणखी एक प्रत कलकत्ता येथील एशियाटिक सोसायटीत आहे.  सर जदुनाथ सरकार यांनी त्याची प्रत तयार करून आपल्या संग्रही ठेवली. तीची फोटो प्रत मुंबईच्या सरकारी दप्तरखान्यात आहे. यात 32 पत्रे आहेत. त्यातील एक पत्र शाईस्ताखानाची बोटे छाटल्यानंतर महाराजांनी औरंगजेब बादशहाच्या अधिकार्‍याला लिहलेले येथे सादर करीत आहे.

दूरदृष्टीच्या विचारवंतांना ही गोष्ट माहीत असावी की , गेली तीन वर्षात बादशहाचे प्रसिद्ध सेनापती या भागात येत आहेत. माझा मुलूख व किल्ले जिंकून घ्यावेत अशी बादशहांने त्यांना आज्ञा केली. अपार कष्ट रूपी घोड़ेदेखिल माझ्या या मुलूखात फिरू शकत नाहीत...
अदिलशहाकडून अफजलखान प्रचंड सैन्यानिशी आला. तो असमर्थ बनून नाश पावला. ही वस्तूस्थिती तुम्ही बादशहाला का कळविली नाही..? यामुळे तुमचा नाश टळेल.

अफजल नंतर अमीरूल शाईस्ताखान हा माझ्या उंच पर्वतांनी व खोल दर्यांनी युक्त अशा प्रदेशावर चालून आला. तीन वर्षे त्याने पराकाष्ठा केली. मी शिवाजीचा मुलूख जिंकून घेईन, असे त्याने बादशहाला कळविले. अशा खोट्या वृत्तीचा व्हायचा तोच परिणाम झाला. फजिती होऊन त्याला निघून जावे लागले. ही गोष्ट सूर्यप्रकाशाईतकी स्पष्ट आहे.

माझ्या देशाचे रक्षण करणे हे माझे कर्तव्य होय.स्वत:ची प्रतिष्ठा कायम राखण्याकरीता तुम्ही बादशहाला खोटे लिहून पाठवता. पण माझ्यावर परमेश्वराची कृपा आहे. या देशावर आक्रमण करण्याच्या उद्देशाने येणारा कोणीही असो. त्याची ईच्छा फलद्रुप झाली नाही....

रक्ताच्या या नदीची भिती सर्व शहाण्यांना वाटते , कारण यातून आपली नाव सुरक्षित नेणे कुणालाच जमले नाही...... ! "

असे हे पत्र बादशहाच्या सेनापतींची परखडपणे कानउघडणी करणारे असून महाराजांचा स्वाभिमान व आत्मविश्वास व्यक्त करणारे असे आहे.
संदर्भ- खुतूते शिवाजी

||फक्तइतिहास||